ТҰТЫНУШЫЛАРДЫҢ ПІКІРЛЕРІНІҢ МЕЙРАМХАНА ҚЫЗМЕТІНІҢ САПАСЫН АРТТЫРУҒА ӘСЕРІ: ТҮРКІСТАН ҚАЛАСЫ МЫСАЛЫНДА

Аңдатпа

Бұл мақалада тұтынушылардың пікірлерінің мейрамхана бизнесінде қызмет сапасын арттыру құралы ретінде қолдану жолдары жайлы зерттеу нәтижелері ұсынылған. Негізгі назар Түркістан қаласының тұтынушыларының кері байланысын талдау арқылы қала мейрамханаларының күшті және әлсіз жақтарын анықтауға, сондай-ақ тағамдар мен қызмет көрсетудің сапасын жақсартуға аударылған. Деректерді өңдеудің заманауи тәсілдері қарастырылған, соның ішінде табиғи тілдерді өңдеу (NLP), машиналық оқыту және сауалнама әдістері, олар тұтынушылардың талғамдары мен қанағаттану деңгейін жүйелі түрде зерттеуге мүмкіндік береді. Зерттеуде Түркістан қаласының қоғамдық тамақтандыру орындарындағы қызмет көрсету сапасының негізгі параметрлеріне ерекше көңіл бөлінген, соның ішінде тапсырыстарды орындау жылдамдығы мен дәлдігі, қызметкерлердің кәсібилігі мен жауапкершілігі, сондай-ақ қызметтердің сенімділігі. Әртүрлі елдердің мейрамханаларында тұтынушылардың пікірлерін өңдеу және қызмет көрсету мен тағам сапасын жақсарту бойынша инновациялық шешімдерді енгізу әдістеріне салыстырмалы талдау жасалды.
Алынған деректер негізінде тұтынушылардың сұраныстарына жедел жауап беру және олардың қанағаттану деңгейін арттыру үшін кері байланыс талдау технологияларын Түркістан қаласының қоғамдық тамақтандыру орындарында қолданудың маңыздылығы туралы қорытынды жасалды. Бұл мейрамханалардың бәсекеге қабілеттілігін нығайтуға ықпал етеді. Жиналған ақпаратты өңдеу үшін JASP және Taguette бағдарламалық құралдары пайдаланылды, олар қазіргі зерттеулерде деректерді сапалы талдауды қамтамасыз етеді. Зерттеудің мақсаты – тұтынушылардың тағамдар мен қызмет көрсету сапасына қанағаттануына әсер ететін факторларды анықтау және мейрамханалар жұмысының негізгі аспектілерін жетілдіруде табиғи тілдерді өңдеу (NLP), машиналық оқыту әдісін кеңінен қолдану бойынша ұсыныстар берілген.